ന്യൂഡല്‍ഹി: കോവിഡ് രണ്ടാംതരംഗം രാജ്യത്ത് വ്യാപകമായിരിക്കേ നടക്കുന്ന കുംഭമേളക്കെതിരെ വിമര്‍ശനമുയരവേ ന്യായീകരണവുമായി ബി.ജെ.പി എം.എല്‍.എ. ഉത്തര്‍പ്രേദശിലെ ബി.ജെപി എം.എല്‍.യും നേതാവുമായ സുനില്‍ ഭരലയാണ് ന്യായീകരണവുമായി രംഗത്തെത്തിയത്.
''കോവിഡിനേക്കാള്‍ വലുതാണ് കുംഭമേളയിലുള്ള വിശ്വാസം. എനിക്ക് കോവിഡ് പോസിറ്റീവായിരുന്നു. എന്നിട്ടും ഏപ്രില്‍ 13ന് ഞാന്‍ കുംഭമേള സന്ദര്‍ശിച്ചു. കോവിഡിനെതിരെ ഗംഗാമാതാവ് പൊരുതും. നിസാമുദ്ദീന്‍ മര്‍കസിലെ സാഹചര്യവും കുംഭമേളയും താരതമ്യം ചെയ്യാനാവില്ല'' -സുനില്‍ ഭരല പറഞ്ഞു.
കോവിഡ് വ്യാപനത്തിന്‍റെ പശ്ചാത്തലത്തില്‍ ഉത്തരാഖണ്ഡ് കുംഭമേള പ്രതീകാത്മകമായി നടത്തണമെന്ന് പ്രധാനമന്ത്രി നരേന്ദ്ര മോദി ആവശ്യപ്പെട്ടിരുന്നു.
കുംഭമേളയുടെ ഭാഗമായി സന്യാസിമാര്‍ ഗംഗ നദിയില്‍ കുളിക്കുന്ന ചടങ്ങ് ഒഴിവാക്കണമെന്നാണ് മോദി ആവശ്യപ്പെട്ടത്.
