ദില്ലി: ഭാര്യയെ വെട്ടിക്കൊലപ്പെടുത്തിയശേഷം ഓടിരക്ഷപ്പെടാന്‍ ശ്രമിച്ച യുവാവിനെ നാട്ടുകാര്‍ ചേര്‍ന്ന് മര്‍ദ്ദിച്ച്‌ കൊന്നു. ഉത്തര്‍പ്രദേശിലെ ഫത്തേപൂരില്‍ ബുധനാഴ്ചയായിരുന്നു സംഭവം. നാല്‍പതുകാരനായ നസീര്‍ ഖുറേഷിയാണ് മരിച്ചത്.
കുടുംബവഴക്കിനെ തുടര്‍ന്ന് ഭാര്യ അഫ്സാരി (35)യെ നസീര്‍ മഴു ഉപയോഗിച്ച്‌ വെട്ടി പരിക്കേല്‍പ്പിക്കുകയായിരുന്നു. സംഭവസ്ഥലത്തുവച്ച്‌ തന്നെ അഫ്സാരി മരിച്ചു. ആക്രമണത്തില്‍ അഫ്സാരിയുടെ അമ്മയ്ക്കും സഹോദരിക്കും പരിക്കേറ്റിട്ടുണ്ട്. ഇവരെ ആശുപത്രിയില്‍ പ്രവേശിപ്പിച്ചു. സിമൗര്‍ ഗ്രാമത്തിലെ അഫ്സാരിയുടെ അമ്മ വീട്ടിലാണ് നസീര്‍ താമസിച്ചിരുന്നത്.
അഫ്സാരിയെ ആക്രമിച്ചതിന്ശേഷം നസീര്‍ ഓടിരക്ഷപ്പെടുന്നതിനിടെ അമ്മയും സഹോദരിയുമാണ് കൊലപാതക വിവരം നാട്ടുകാരെ വിളിച്ചറിയിച്ചത്. തുടര്‍ന്ന് ഒരു കൂട്ടം ആളുകള്‍ ചേര്‍ന്ന് നസീറിനെ പിടികൂടുകയും ക്രൂരമായി മര്‍ദ്ദിക്കുകയുമായിരുന്നു. സംഭവസ്ഥലത്തുവച്ച്‌ തന്നെ നസീര്‍ കൊല്ലപ്പെട്ടിരുന്നു.
നസീറിനെ ആള്‍ക്കൂട്ടം മര്‍ദ്ദിക്കുന്നതിന്റെ ദൃശ്യങ്ങള്‍ ചുറ്റും കൂടിനിന്നവരില്‍ ചിലര്‍ മൊബൈല്‍ ഫോണില്‍ ചിത്രീകരിച്ചിരുന്നു. നസീറിനെതിരെ കല്ലെറിയുന്നതും വടിയും ഇരുമ്ബുദണ്ഡും ഉപയോഗിച്ച്‌ മര്‍ദ്ദിക്കുന്നതും ദൃശ്യങ്ങളില്‍ വ്യക്തമാണ്. ആറുപേര്‍ ചേര്‍ന്നാണ് നസീറിനെ മര്‍ദ്ദിച്ചത്. സംഭവത്തിന്റെ ദൃശ്യങ്ങള്‍ സോഷ്യല്‍മീഡിയയില്‍ പ്രചരിച്ചതോടെയാണ് പൊലീസ് നടപടിയെടുത്തത്. വീഡിയോ പ്രചരിപ്പിച്ച അഞ്ചില്‍ മൂന്ന് പേരെ പൊലീസ് അറസ്റ്റ് ചെയ്തു.
നസീറിന്റെയും ഭാര്യയുടെയും കൊലപാതകത്തെക്കുറിച്ച്‌ അന്വേഷണം നടത്തിവരുകയാണെന്ന് ഫത്തേപൂര്‍ ഡിഎസ്‍പി ശ്രിപാല്‍ യാദവ് പറഞ്ഞു. പോസ്റ്റുമോര്‍ട്ടത്തിനായി ഇരുവരുടെയും മൃതദേഹം ആശുപത്രിയിലേക്ക് മാറ്റി. അക്രമസാധ്യതനിലനില്‍ക്കുന്നതിനാല്‍ പ്രദേശത്ത് പൊലീസിനെ വിന്യസിച്ചിട്ടുണ്ട്.
