ടൂറിന്‍: പുതുസീസണില്‍ യുവന്‍റസ് വിട്ട് മറ്റേതെങ്കിലും ചേക്കേറാനുള്ള ആഗ്രഹവുമായി സൂപ്പര്‍താരം ക്രിസ്റ്റ്യാനോ റൊണാള്‍ഡോ. വരുന്ന ട്രാന്‍സ്ഫര്‍ വിന്‍ഡോയില്‍ കൂടുമാറാനുള്ള താല്‍പര്യം ക്ലബിലെ അടുത്ത സുഹൃത്തുക്കളോടാണ് പോര്‍ചുഗീസ് ഫുട്ബാളര്‍ വ്യക്തമാക്കിയതെന്ന് ഇറ്റാലിയന്‍ മാധ്യമങ്ങള്‍ റിപ്പോര്‍ട്ട് ചെയ്തു.
റയല്‍ മഡ്രിഡില്‍നിന്ന് 2018ലാണ് െറാണാള്‍ഡോ യുവന്‍റസിലെത്തിയത്. 36കാരനായ താരം ജൂണ്‍ 2022 വരെ ഇറ്റാലിയന്‍ ക്ലബുമായി കരാറില്‍ ഒപ്പിട്ടുണ്ടെങ്കിലും ഈ വര്‍ഷം വിട്ടുപോവാനാണ് സാധ്യതയെന്നാണ് സൂചന.
പഴയ ടീമുകളായ മാഞ്ചസ്റ്റര്‍ യുനൈറ്റഡും സ്പോര്‍ട്ടിങ് ലിസ്ബണും റൊണാള്‍ഡോയെ ടീമില്‍ തിരികെെയത്തിക്കാന്‍ ആവേശത്തോടെ രംഗത്തുണ്ടെന്നാണ് റിപ്പോര്‍ട്ടുകള്‍.
അതേസമയം, ക്രിസ്റ്റ്യാനോയെ വീണ്ടും ക്ലബിലെത്തിക്കുന്നതില്‍ റയല്‍ മഡ്രിഡിന് വലിയ താല്‍പര്യമില്ല. യുവന്‍റസിനൊപ്പം മൂന്നുവര്‍ഷം ബൂട്ടുകെട്ടിയ റൊണാള്‍ഡോ ക്ലബിനുവേണ്ടി 101 ഗോളുകള്‍ നേടിയതിനുപുറമെ 22 ഗോളുകള്‍ക്ക് വഴിയൊരുക്കിയിട്ടുമുണ്ട്.
