ബേക്കല്: സമൂഹമാധ്യമത്തിലൂടെ പരിചയപ്പെട്ട പത്തൊമ്പതുകാരിയെ വിവാഹവാഗ്ദാനം നല്കി പഴനിയില് കൊണ്ടുപോയി പീഡിപ്പിച്ച യുവാവ് അറസ്റ്റില്. കൊല്ലം ഇരവിപുരം സ്വദേശി വിഷ്ണു (23) വിനെയാണ് ബേക്കല് പോലീസ് കൊല്ലത്തെത്തി അറസ്റ്റ് ചെയ്തത്. ബേക്കല് സ്വദേശിനിയായ പെണ്കുട്ടിയാണ് പീഡനത്തിനിരയായത്.
കോവിഡ് നിയന്ത്രണങ്ങള് തുടങ്ങുന്നതിനുമുമ്പ് കഴിഞ്ഞ ഫെബ്രുവരിയിലാണ് സംഭവം നടന്നത്. ഇന്സ്റ്റഗ്രാമിലൂടെയാണ് ഇരുവരും തമ്മില് പരിചയപ്പെട്ടത്. പിന്നീട് മൊബൈല് നമ്പര് കൈമാറുകയും പ്രണയത്തിലാവുകയും ചെയ്തു.
തുടര്ന്ന് യുവാവിന്റെ നിര്ദേശപ്രകാരം പെണ്കുട്ടി വീടുവിട്ടിറങ്ങുകയും പിന്നീട് ഇരുവരും ചേര്ന്ന് പഴനിയിലേക്ക് പോവുകയുമായിരുന്നു. വിവാഹവാഗ്ദാനം നല്കി പെണ്കുട്ടിയെ ശാരീരിക പീഡനത്തിന് വിധേയയാക്കിയെങ്കിലും പിന്നീട് നാട്ടിലേക്ക് തിരിച്ചയക്കുകയായിരുന്നു. തിരിച്ചെത്തിയ ശേഷമാണ് പെണ്കുട്ടി യുവാവിനെതിരേ പോലീസില് പരാതി നല്കിയത്.
കൊല്ലത്ത് നടന്ന അടിപിടിക്കേസില് അറസ്റ്റിലായി റിമാന്ഡില് കഴിയുന്നതിനിടെയാണ് ബേക്കല് പോലീസ് അവിടെയെത്തി വിഷ്ണുവിന്റെ അറസ്റ്റ് രേഖപ്പെടുത്തിയത്.
പിന്നീട് കാസര്ഗോട്ടെത്തിച്ച് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
