ന്യൂഡൽഹി: ഇന്ത്യൻ മണ്ണ് പിടിച്ചടക്കിയ ചൈനയോട് നരേന്ദ്ര മോദി കീഴടങ്ങിയെന്ന് കോൺഗ്രസ് നേതാവ് രാഹുൽ ഗാന്ധി. 2020 ഏപ്രിലിലെ തൽസ്ഥിതി പുന:സ്ഥാപിക്കാൻ പോലും ആയിട്ടില്ല. പൊരുതാൻ സൈന്യം തയാറായിട്ടും ഭീരുവായ പ്രധാനമന്ത്രി നരേന്ദ്ര മോദി തയാറായിട്ടില്ലെന്ന് രാഹുൽ പറഞ്ഞു. വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.
ഫിംഗർ നാലു വരെ ഇന്ത്യയുടെ മണ്ണാണ്. എന്നാൽ ഫിംഗർ മൂന്നിലേക്ക് മാറുകയാണ് നമ്മളിപ്പോൾ. മോദി ചൈനയോട് കീഴടങ്ങിയിരിക്കുകയാണെന്നും രാഹുൽ പറഞ്ഞു.
ചൈന കയ്യേറിയ സ്ഥലങ്ങളിൽ അവരിപ്പോഴും തുടരുകയാണ്. ഇന്ത്യൻ സേന തിരിച്ചു പിടിച്ച സ്ഥലങ്ങളെല്ലാം തിരിച്ചു നൽകിയെന്നും ഭീരുവായ പ്രധാനമന്ത്രി ഇന്ത്യൻ മണ്ണ് നഷ്ടപ്പെടുത്തുകയാണെന്നും രാഹുൽ പറഞ്ഞു.
