കാസർഗോഡ്: സർക്കാർ ഉത്തരവ് ലംഘിച്ച് വിവാഹ ചടങ്ങ് നടത്തിയതിന് ഓഡിറ്റോറിയം ഉടമയ്ക്കെതിരേ കാസർഗോഡ് ടൗൺ പോലീസ് കേസെടുത്തു. നെല്ലിക്കുന്ന് ലളിതകലാ സദനം ഓഡിറ്റോറിയത്തിൽ മുന്നൂറിലധികം ആളുകളെ പങ്കെടുപ്പിച്ച് വിവാഹം നടത്തിയതിനാണ് കേരള പകർച്ചവ്യാധി നിയന്ത്രണ നിയമപ്രകാരം കേസെടുത്തത്. ഇന്നലെ ഉച്ചകഴിഞ്ഞ് 2.30 ഓടെയായിരുന്നു പോലീസ് നടപടി. തുടരന്വേഷണം നടത്തി കൂടുതൽ ആളുകൾക്കെതിരേ കേസെടുക്കുമെന്ന് ഇൻസ്പെക്ടർ അറിയിച്ചു.
സെമിനാര് നടത്തി
പാലാവയൽ: കോവിഡ് വാക്സിൻ എടുക്കേണ്ടതിന്റെ ആവശ്യകതയും കോവിഡ് പ്രതിരോധ മാർഗങ്ങളുമായി ബന്ധപ്പെട്ട് കെസിവൈഎം പാലാവയൽ യൂണിറ്റിന്റെ നേതൃത്വത്തിൽ ഓൺലൈൻ സെമിനാർ നടത്തി. പാലാവയൽ സെന്റ് ജോൺസ് പള്ളി വികാരി റവ. ഡോ. തോമസ് ചിറ്റിലപ്പിള്ളി ഉദ്ഘാടനം ചെയ്തു. ഡോ. നമിത സെബാസ്റ്റ്യൻ, ഡോ. ജോർജിയ ജോർജ്, ഡോ. ജോബി ജോർജ് എന്നിവർ ക്ലാസ് നയിച്ചു. ഫാ. ആൽവിൻ ഞെഴുങ്ങൻ, എമിൽ നെല്ലംകുഴി, ഫെബിൻ സെക്യൂറ, അലൻ കാവുകാട്ട് എന്നിവർ നേതൃത്വം നൽകി.