കഴിഞ്ഞ രണ്ടാഴ്ചയായി ഉഡുപ്പിയിലും മണിപ്പാലിലും യാചകരുടെ എണ്ണം കൂടിവരികയായിരുന്നു. എല്ലാവരുടെയും കൈകളിലോ ഒപ്പമോ കുട്ടികൾ ഉണ്ടായിരുന്നു. ഇത് ശ്രദ്ധിച്ച പ്രദേശവാസികളാണ് ബാലസുരക്ഷാവകുപ്പിൽ പരാതിപ്പെട്ടത്. തുടർന്ന് നടത്തിയ പരിശോധനയിലാണ് കുട്ടികളെ രക്ഷപ്പെടുത്തിയത്. രക്ഷപ്പെടുത്തിയ നാല് പെൺകുഞ്ഞുങ്ങളെ ബാലമന്ദിരത്തിലേക്ക് മാറ്റി. ബാക്കി ആൺകുട്ടികളെയും പെൺകുട്ടികളെയും ശങ്കരപുരയിലെ പുനരധിവാസകേന്ദ്രമായ സ്പൂർത്തി വിശ്വസദ മനയിൽ പാർപ്പിച്ചു. രാജസ്ഥാൻ, ആന്ധ്രപ്രദേശ്, ഉത്തര കർണാടക എന്നിവിടിങ്ങളിൽ നിന്നാണ് സ്ത്രീകൾ കുട്ടികളുമായി ഭിക്ഷാടനത്തിനെത്തുന്നത്. സ്ഥിരമായി ഒരു സ്ഥലത്ത് താമസിക്കാതെ വിവിധ ഭാഗങ്ങളിൽ ഭിക്ഷാടനം നടത്തുന്നതിനാൽ ഇവരെ കണ്ടെത്തുക പ്രയാസമാണെന്ന് ചൈൽഡ് ലൈൻ പ്രവർത്തകർ പറയുന്നു. സ്ത്രീകളെയും കുട്ടികളെയും പുനരധിവാസകേന്ദ്രത്തിലേക്ക് മാറ്റാനുള്ള ശ്രമത്തിലാണ് പ്രവർത്തകർ.
