മുംബൈ: മുമ്ബ് പരിചയമില്ലാത്ത ഇടങ്ങളിലേക്ക് ഗൂഗിള്‍ മാപ്പ് നോക്കി യാത്ര ചെയ്യുന്നത് ഇക്കാലത്തു പതിവാണ്. എന്നാല്‍ ഗൂഗിള്‍ മാപ്പിനെ കണ്ണടച്ച്‌ വിശ്വസിച്ച്‌ പിന്തുടര്‍ന്ന പുണെയിലെ വ്യാപാരികളുടെ കാര്‍ ചെന്നുവീണത് ഡാമില്‍. ഒരാള്‍ മുങ്ങി മരിക്കുകയും ചെയ്തു.
മഹാരാഷ്ട്രയിലെ അഹ്മദ് നഗറിലുള്ള അകോലെയിലാണ് സംഭവം. പുണെ, പിമ്ബ്രി-ചിഞ്ച്വാടില്‍ താമസിക്കുന്ന വ്യാപാരി സതിഷ് ഗുലെ (34)യാണ് മുങ്ങി മരിച്ചത്. കാറില്‍ ഒപ്പമുണ്ടായിരുന്ന സുഹൃത്തുക്കളായ ഗുരു ശേഖര്‍, സമീര്‍ രാജുര്‍കര്‍ എന്നിവര്‍ നീന്തി രക്ഷപെട്ടു.
ശനിയാഴ്ച രാത്രി അകൊലെക്കടുത്തുള്ള കല്‍സുബായ് മലകയറാന്‍ പുറപ്പെടുകയായിരുന്നു മൂവരും. കോട്ടുലില്‍ നിന്നും അകൊലെയിലേക്കുള്ള എളുപ്പ വഴിക്കായി ഇവര്‍ ഗൂഗിള്‍ മാപ്പിനെ ആശ്രയിക്കുകയായിരുന്നു.
മഴക്കാലത്ത് വെള്ളം കയറി പാലം മുങ്ങുകയും അപകടാവസ്ഥയില്‍ ആവുകയും ചെയ്തതോടെ ഗതാഗതം നിരോധിച്ച വഴിയായിരുന്നു ഇത്. യാത്ര നിരോധിച്ചതാണെങ്കിലും ഇതുസംബന്ധിച്ച അറിയിപ്പുകള്‍ വഴികളില്‍ സ്ഥാപിച്ചിരുന്നില്ല.
അപകടവിവരമറിഞ്ഞ് ഓടിയെത്തിയ നാട്ടുകാര്‍ സതിഷ് ഗുലെയുടെ മൃതദേഹവും കാറും ഡാമില്‍ നിന്നും പുറത്തെടുത്തു.
